"Waranka, waranka kari warmikunami kanchi, juyayay, mana pipash sarunkachu"

"Somos millones de hombres y mujeres ¡carajo¡ y nadie nos pisoteará"

Discurso en Kichwa del Dr. Luis Macas A, al asumir la conducción de la CONAIE.

Quito, 14 de enero de 2005

Taita Intipak shutipi, pacha mamapak shutipi, yupaychani nini, ñaupa yaya kunata, Tupak Amaru, Micaela Bastidas, Tawantinsuyuta ñaupaman apak jatun Pachakutikta.

Ñukanchi yaya Atahualpa, ñukanchi jatun shinchik yaya Rumiñahui shutipi kai punlla sumak punllapi, kay Raymi punllapi kay ushaita ñuka makipi chaskini, yupaychani tukuy markakunata, yupaychani nini tukui ñukanchik ayllu llactakunata, yupaychani Saraguro ayllu, Loja markapi Zamora markapi kakunata, yupaichani Cañari ayllu llaktata, Azuay, Cañar markakunapi kawsakunata, yupaychani nini Purua ayllu llaktata, yupaychani nini Panzaleo, Huaranka, Kisapincha, Salasaca, Chibuleo tukuy paykunata yupaichani nini, yupaichanimi Kayambi ayllu llaktata, yupaichanimi Otavalo, Natabuela, Karanki tukuy kai ayllu llaktakunata yupaichani nini, Siona, Secoya, Huaorani, Cofan, kichwa, shuar achuar, zapara, shiwiar, tukuy kankunata yupaychani nini, shinallata kuntik suyu llaktapi awa, chachi, tsachila, manta huancavilca ayllu llaktakunata yupaichani nini kunan kay punllapi epera kunata tukuy kaypi kakkunata yupaychani nini.

Yupaichani nini ñuka aylluta, yupaychani nini ñuka wawakunata ñuka churi Pachakutik, Ñuka ushi Katik, ñuka sumak ushi kikinta yupaychani Achik Pakari, ñuka yupaychani nini ñuka sumak Wilka Diana, ñuka warmita tukuy punllakunata paykuna ñukata yanapashkamantak ñukaman ushayta kushkamanta yupaychani nini.

Tukuy yuyaiwanmi japini, tukuy shunkuwanmi japini kikinpa ñuka makipi churashkata mana pandarishpalla mana shun ñanda rishpa kikinkunawan tantarishpa ñaupaman katishun, tukuymi Conaita shayachina kanchik.
Conaika mana shinallachu, Conaika ñukanchik jatun ushayta apak, tukuy ñukanchik ayllu llaktakunapak ushayta apak.

Ñukanchika wakinpika pantarinchi, pita kay mama llaktapika ñukanchik ushayta apan wakinpika pantarishpa, ninchik Gutierrezmi kanka nishpa, paika mana ñukanchik pushakchu kan, ñukanchik purami pushanakuna kanchik, runapurami pushanakuna kanchik.

Wakinpika ñukanchik pantarinchik, ñukanchika chay wikza mapakunata, chay charik kunata, washata katishkanchik kullkimanta, washata katirinchik ñukanchiman pichka, ishkay punllallapish karanka nishpa, mikunata kunka nishpa, ari kunkami imashinami kaypi nirkakuna, ña kunkami shuk, ishkay, kimtza mikunata kunkami shinallata tukuy ñukanchik kawsay pachata, ñukanchik wawakunata llankaywa wañuchinkapak, yarjaymanta wañuchinkapak runakutan mishukunata yanakunata imashimami kunan punllakaman charin.

Ama katishpalla ñukanchika shuk mushuk pushayta maskashun, mushuk pushakta wichayman shayachishun ñukanchillatik, ñukanchik maki ñukanchik yuyayhua ñukanchik tukui shunkuwa, wawakuna wasipi shuyakunkami yayakuna urkupi shuyakunkami imatata apakrinchik kaymantaka kai mushuk pushayta, kay mushuk yuyayta apashun mashikuna, taytakuna, mamakuna, wambrakuna, wawakuna kaypi kakuna, kay mushuk pushayta shinchita shayachishun maypi kashpapash urkupikashpa, waykupikashpa, shacha ukupi kashpa, maypikashpapash runakunami kay pushaytaka ñawpaman shayachina kanchik.

Por: A.N.P.E.

Más información en www.conaie.org, www.ecuarunari.org