Consejo de Gobierno

ECUARUNARI ECUADOR RUNACUNAPAC RICCHARIMUI
Confederación de los Pueblos de Nacionalidad Kichua del Ecuador

 
Noticias

ECUARUNARI Asamblea Constituyentemanta Makanakuy

Chiri llaktamanta Kichwa runakuna;  sacha llaktamanta, Shuar, Achuar, Huaorani, Cofan, Siona, Zapara runakuna; kunuk llaktamanta, Awa,  Chachi, Epera, Tsachila runakuna, tukuykunaka 10 warankakunami Quituman chayamurka, Asamblea Constituyenteta rurachun mañankapak.

Jipa punchakuna kay makanajuikunaka ashtawanmi wiñarinka nirkakunami CONAIE, ECUARUNARI, CONFENIAE, CONAICE tantanakuymanta punta pushakkunaka, Kay jatun makanakuykunaka, yachakkunapak pichaykunawanmi kallarirka, kay kaparikuna alli, sinchi kachun nishpa.

11 pacha tutamantapimi, Quitu ñankunata purikunaka kallarirka, Congreso wasi ñawpata yallishpa, presidencia ukuman chayarkakuna.  Punta rimaykunapi ECUARUNARIMANTA pushak Humberto Cholangoka, runakunapak mañaykunamanta rimarkami. 

Shinapash, runakuna makanakunkakaman, Congresopi, MPD, RED, SOCIALISTA, PACHAKUTIK, PSP yuyal tantarikuna wankurishpa, 57 shitaykunawan, Consulta Popularman kayachichun ari nishpa sakirka.    Ashtawanpash, diputadokunaka mana atita sakinkapak munankunachu.   Kutin, PSC, UDC, PRIAN piñarishpa rimaykunamanta llukshirkami.

Chaymanta, runakuna, shuk tantanakuykunapash, ñankunapi makanakunkunami, ama Congreso munashkata rurachun sakinkapak. Tukuy Ecuadormanta runakunami tukuylla diputadokuna atita sakichun ninakun, mana alli llankashkamanta.

Mana legislativo munashkata shinachun sakishunchu nirkami Runa pushakkunaka, ashtawankarin, makanakuykunata sinchiyachishpa, runakuna munashkata paktachinkakamanmi makanakushun nirkakunami.    Shina kashkamanta, Consulta Popularta shinay ushachun  shuk Tribunal Supremo Electoralta shutichichun mañarkakunami.  

Ña chishi pachakunapi, Conaiemanta pushak Luis Macas, Ecuarunarimanta pushak Humberto Cholango, Confeniaemanta pushak Domingo Ankuas, Fenoccinmanta Pushak Pedro de la Cruz , shuk tantarikunamanta pushakkunawan pakta, Palacio de Gobiernoman yaykurkami, mamallaktata pushakwan rimankapak, chaypillata MANDATO DE LAS NACIONALIDADES Y PUEBLOS INDIGENAS AL GOBIERNO NACIONAL  killkakunata chayachinkapakpash.   Chaypimi wacchakunapak mutsuikunata rikushpa pushachun mañarka gobierno pushakkunata.  

Kay jipaka, kutinmi parque  Arbolito kuskaman tikrankakuna, tantarishpa jipa ruranakunamanta rimankapak.   
 
WILLACHIK – ECUARUNARI - CONAIE