Cañar, 19 de mayo de 2.006
Ecuador Runakunapak Rikcharimuy Ishkay Niki jatun tantanakuyka Cañar Marka, Coliseo Tiopambapimi rurarikun. Tantanakuypak rimarykunawan katishpaka, tukuy apukkunapak llamkashkakunata willashpami kallarirka shina: CODENPE, DINEIB, DSPI, Movimiento Pachakutik, CONAIE, Consejo de gobierno ECUARUNARImantapash.
CONAIE tantanakuyta pushak, Luis Macas paypak llamkaymanta willashpaka runakunapak kawsaymanta, tantanakuymanta, política jawa sinchita yuyarishpa katinami kan, kipaman shuktak ñankunata mashkashpa tukuy kawsaymarkakunapak allikawsayta charinkapak nirkami. Shinallatak TLC, OXY kay mamallaktamanta llukshirishkata kushikuywan yuyarirka. Shinapish, TLCmantaka wañuykaman makanakushpa katinami kan nirkami.
ECUARUNARI tantanakuyta pushak, Humberto Cholangoka mamallaktapak política jawa, shinallatak runakunapak tantanakuymantami rimarirka. Kay tantanakuyka mushuk kawsaypak ñanmi tukun nirkapishmi; shinallatak, kay paktayka runakunapak makanakuywanmi chay ñanman chayarkanchik nirkami, shinapish Lucio Gutiérrezpa pushaypachapika ñukanchik tantanakuyka may rimashkakunawan shikanyachingapakmi munarka nircami.
Ecuador mama llaktapi runakunapak tantanakuyka, Amèrika Latinapa tantanakuyta katishpami jatun kan nirkami. Shinallatak kay puchuk watakunapi tukuy runakuna yanapashkamantami shunkumanta yupaycharka. Petrolera OXY llukshichunka sinchitami makanakurkanchik nirkami, shinallatak TLCmantapash makanakushpa katishunmi nirkami.
Tukuchingapakka, “ECUARUNARIka politikapi, administracionpi, proyectokunatapash rurashpami llankakun”, nirkami.
Chishika tantarishpami kay llamkaykunaman yallirkakuna: Llamkay willay jawa rimanakuy, Oxy, TLC; kay pacha imashina politica kakmantapash, imashina kichwa runakunapak tantanakuyta sinchiyachinamanta, yachaskushpa katinamanta, allpamamamanta, pacha mamapi imakuna tiyakmantapish, willanamanta, DINEIB, CODENPE, DNSPI, Coordinadora Andinamantapish, shuktak tantanakuykunawan wankurishpa llamkaymanta; runakunapak jaynikunata imashina paktachinamanta, kay watapi imashina ñukanchik Movimientowan apukkuna akllaypi llukshinamantapash.
Kilkary pankata wichkashka kipaka, waranka chusku patsak runakunami tantarishkanchik, chaymantaka iskun runakuna Boliviamanta, Perumanta, Colombiamanta Chilemantapashmi karkakuna.
Traducción: Gladis Quinde y Martha Santillán
Comisión de Comunicación
II CONGRESO DE ECUARUNARI
|
