Kayna illapa puncha, Ecuador Runakunapak Jatun Tantanakuy, Confederación de Nacionalidades Indígenas del Ecuador, CONAIE,  imashina puchukay makanakuykuna aparishkamanta rimankapak, Quitupi, tantarirkami.  Chaypika kutinmi,  Tratado de Libre Comerciota, Compañía Petrolera Occidentalta, Plan Colombiata na munanchichu nirkakuna, shinallatak, Asamblea Nacional Constituyenteman kayachichunpash, mañarkakunami Ecuadormanta pushakkunata.

Kay tantanakuy puchukaypika, kunuk, chiri, sacha ayllu llaktakunamanta, pushakkunapash, ashtawan ushayta japishpa, jatarikunata sinchiyachinkapakmi sakirirkakuna.

 

 

a.      Tukuy Ecuadormanta sami runakunaka makanakuykunata sinchiyachinkapakmi sakirirkanchi.

 

b.      Kutinmi, TLCta  na  shuti aspichun, Compañía Occidentalta llukchichun, Plan Colombiapi ama kimirichun, Asamblea Nacional Constituyenteman kayachichunpash, mañanchi.

 

 

c.      Alfredo Palaciopak gobierno, makanakuk karikunata, warmikunata, wawakunata, tukyachina ashnakunawan llakichishkamanta, na alliyarishka, piñarishkapashmi kanchi.

 

d.      Shinallatak, tukuy Ecuadormanta  yanakunata, mishukunata, runakunatapash kayachinchimi, ñukanchi makanakuykunapi  wankurishpa, mamallaktapak alli kawsayta tarinkakaman, jatarinkapak.

 

 

e.      Evangelico runakunatapash napanchimi, chikan markakunapi, kay sinchi makanakuykunaman kimirishkamanta.

 

Tantanakuyka, kay ñawpa tayta mamakunapak yuyaywanmi tukurirka “Runakunaka urku  shinami kanchi, kuchukpipash, kutipash wiñarinchimi”

CONSEJO POLITICO PUSHAKKUNA

 

Santiago De La Cruz

CONAIEMANTA KATI PUSHAK

 

Humberto Cholango

ECUARUNARIMANTA PUSHAK

 

Oscar Chiripua

CONAICEMANTA PUSHAK

 

Hilda Santi

ANTISUYUMANTA COMISION POLITICATA PUSHAK