 | MASHI LUIS MACAS, HUMBERTO CHULANGOTAPASH WISHKASHA NISHPA MANCHACHINKUNA
Kitupi, 18 pawkar raymi, 2.006
Kunana tutamanta, Humberto Cholango Confederación de Pueblos de la Nacionalidad Kichwa del Ecuador-ECUARUNARI tartarita pushak shinallatak Luis Macas, Confederación de Nacionalidades Indígenas del Ecuador –CONAIE tantanakuyta pushak wishkasha nishka manchachita chaskirkami awkakunapak makimanta mana kaparikunata chayllapi sakikpika.
ECUARUNARI tantanakuyta pushak riksichirkami tukuy kay ecuador mamallaktapi kawsakkunaman, kay punllapi tawka kayaykunawan manchachispa kashkamanta wishkasha nishpa, ama ashtawan kaparikunata rurachun nishpa. Kashna llakichina munaywanka ñukanchik kaparikunata kamakta mana sakinchu, imashinami ecuador mamallaktapak kamachipi killkashka kan, shinamanta tukuy ima llakikuna tiyakpika kay mamallaktata pushaktami juchachishun nirkami.
Shinallaltak nirkapashmi tukuy markakunapi llaktakunapi kaparikunawan sinchiyashpa katikunchik ama kay Tratado de Libre Comercio-TLC nsihka yallichun, OXY wira yaku llukshichun sami runakunapak llaktamanta, yapata wakllichishkamanta sami ayllu runakunapak kawsayta. Shinallaltak tawka markakuna kaparikunaw sinchita wankurikunkuna kay Cañar, Zamora, Azuay, Bolívar, Imbabura , Chimborazopipash “nukanchik kawsaymanta kaparipi”.
Nirkapashmi kay ecuadorpak pushak, Alfredo Palacio, awkakunaman nishkami sinchita llakichichun ñukanchik runa kaparikunata. Kay pachakunapi kinsa pacha yallitami antisuyumanta shamuk mashikunata jarkankuna kay chaski Cotopaxi markapi ama Quito pillaman chayachun nishpa, shinallatak yapata llakichishpa wishkashpa kashkami kañar markapi kaparik mashikunata. Shina yakichishpa mashi Alberto Cabascango Cajas llakta Imbabura markapi shuk ñawi lulunta tukyachirkakuna shinallatak mashi Rosa Cristina Ulcuango Cayambemanta Olga Alimaña Chimborazo markamanta jampina wasipi ashka chukririshkami kan, kay awkakuna chapakuna yapata llakichishkamanta ashnak kushnikuwan illapa tukyachikunawan.
Kayllapitak tukuy ecuadorpi kawsakkuman riksichirkami imashina kay OXY wira yaku llukshichik asikushkamanta ñukanchik kamachikunamanta, ashtawankarin kullkipi kusha nin 293 junu dolarpi upalla sakirichun, shina yapata ashtawan wirayashpa charikyashpa katinkapak.
Kañar markapi awkakuna mashkayta rurarkunami kay chawpi punllamanta tukuy llaktakunapak pushakkunata wishkana wasipi llakichinkapak, shinalaltak llatakupi kawsak mashikuna yapa llakichitami charishkakuna, shinallatak tawkakunatmi wishkana wasiman apashka wasikunamanta mashkapashpa warmikuna, wawakunapak ñawpakmanta. Kashnami llakichin ñukanchik runa kamayta 84.
CONAIE-ECUARUNARIMANTA
WILLACHIKKUNA
|
|